ಅಮೇರಿಕಾ ದೇಶದ ಸಾಂಕ್ರಾಮಿಕ ರೋಗಗಳ ಪ್ರಮುಖ ತಜ್ಞ ಎಂದು ಹೆಸರುವಾಸಿಯಾಗಿರುವವರು ಖ್ಯಾತ ವೈದ್ಯ ಹಾಗೂ ಇಮ್ಯುನಾಲಜಿಸ್ಟ್, ಡಾ|| ಅಂತೋಣಿ ಸ್ಟೀಫನ್ ಫೌಚಿ. ಅಮೇರಿಕಾದ ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಹೆಲ್ತ್ ನ ಪ್ರಖ್ಯಾತ ಸಂಶೋಧನಾ ಸಂಸ್ಥೆಗಳಲ್ಲೊಂದಾದ ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಅಲರ್ಜಿ ಅಂಡ್ ಇನ್ಫೆಕ್ಸಿಯಸ್ ಡಿಸೀಸಸ್ (ರಾಷ್ಟ್ರೀಯ ಅಲೆರ್ಜಿ ಮತ್ತು ಸಾಂಕ್ರಾಮಿಕ ರೋಗಗಳ ಸಂಸ್ಥೆ) ನ ನಿರ್ದೇಶಕರಾಗಿ ೧೯೮೪ ರಿಂದ ಕರ್ತವ್ಯ ನಿರ್ವಹಿಸುತ್ತಿರುವ ಡಾ|| ಅಂತೋಣಿ ಫೌಚಿ ರವರು ೫೦ ವರ್ಷಗಳಿಗೂ ಹೆಚ್ಚು ಕಾಲದಿಂದ ಸಾಂಕ್ರಾಮಿಕ ರೋಗಗಳ ಕುರಿತ ಸಂಶೋಧನೆ ಮತ್ತು ಸಾರ್ವಜನಿಕ ಅರೋಗ್ಯ ಕ್ಷೇತ್ರದಲ್ಲಿ ವಿವಿಧ ಹುದ್ದೆಗಳಲ್ಲಿ ಕಾರ್ಯ ನಿರ್ವಹಿಸಿದ್ದಾರೆ. ಡಾ|| ಫೌಚಿ ರವರು ನೇರ ನುಡಿಗೆ ಹೆಸರಾದವರು. ಅವರ ಮಾತನ್ನು ಅಮೇರಿಕಾ ಅಧ್ಯಕ್ಷರಿಂದ ಹಿಡಿದು ಇಡೀ ದೇಶದ ಜನ ಕೇಳುತ್ತಾರೆ ಎನ್ನುವುದು ಯುಎಸ್ ನ ಮಾಧ್ಯಮಗಳ ಅಂಬೋಣ. ಇದು ಅವರ ಅನುಭವ ಮತ್ತು ಪರಿಣತಿಗೆ ಹಿಡಿದ ಕನ್ನಡಿ. ಹಾಗಾಗಿ, ಅಮೇರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ರವರು ದೇಶದಲ್ಲಿ ಕರೋನ ಸ್ಪೋಟದ ನಿರ್ವಹಣೆಗೆ ಪ್ರಸ್ತುತ ರಚಿಸಿರುವ 'ಕರೋನ ಟಾಸ್ಕ್ ಫೋರ್ಸ್' ನ ಮುಖ್ಯ ಸದಸ್ಯರಾಗಿ ಇವರನ್ನು ನೇಮಿಸಿದೆ. ತಮ್ಮ ವೃತ್ತಿ ಜೀವನದಲ್ಲಿ ಹೆಚ್.ಐ.ವಿ., ಸಾರ್ಸ್ (SARS- Severe Acute Respiratory Syndrome), MERS (Middle East Respiratory Syndrome) ಮತ್ತು ಎಬೋಲಾ ದಂತಹ ಸೋಂಕುಗಳು ಹಾಗೂ ಆಂಥ್ರಾಕ್ಸ್ ಜೈವಿಕ ಭಯೋತ್ಪಾದನಾ ದಾಳಿಯನ್ನು ಸಮರ್ಥವಾಗಿ ನಿಭಾಯಿಸಿದ ಅನುಭವವಿರುವ ಡಾ|| ಫೌಚಿ ರವರು ಪ್ರಸ್ತುತ ಕರೋನಾ ಸೋಂಕಿನ ಕುರಿತು ವಿಡಿಯೋ ಸಂದರ್ಶನದಲ್ಲಿ ನೀಡಿರುವ ವಿವರಗಳ ಆಯ್ದ ಭಾಗದ ಭಾವಾನುವಾದ ಇಲ್ಲಿದೆ.
ಸಂದರ್ಶಕ: ಹೆಚ್.ಐ.ವಿ., ಸಾರ್ಸ್, MERS, ಎಬೋಲಾ, ಜ್ಹಿಕಾ ದಂತಹ ಹಲವಾರು ಸಾಂಕ್ರಾಮಿಕ ರೋಗಗಳ ಕುರಿತು ಅಮೇರಿಕಾದ ೬ ಅಧ್ಯಕ್ಷರಿಗೆ ಸಲಹೆಗಳನ್ನು ನೀವು ನೀಡಿದ್ದೀರಿ. ಈ ಎಲ್ಲಾ ಸೋಂಕುಗಳಿಗಿಂತ ಕರೋನ ವೈರಸ್ ಹೇಗೆ ಭಿನ್ನ?
ಡಾ|| ಫೌಚಿ: ಹೊರಹೊಮ್ಮುತ್ತಿರುವ ಸೋಂಕುಗಳಲ್ಲಿನ ಯಾವ ವಿಷಯ ನಿಮಗೆ ಹೆಚ್ಚು ಕಳವಳಪಡಿಸುತ್ತದೆ ಎಂದು ಬಹಳ ಸಮಯಗಳಿಂದ ಹಲವರು ನನಗೆ ಕೇಳುತ್ತಿದ್ದರು. ಒಬ್ಬರಿಂದ ಇನ್ನೊಬ್ಬರಿಗೆ ಸುಲಭವಾಗಿ ಹರಡಬಲ್ಲ, ಹೆಚ್ಚು ಅಸ್ವಸ್ಥತೆ ಮತ್ತು ಮರಣ ಪ್ರಮಾಣ ಹೊಂದಿರುವ ಶ್ವಾಸಕೋಶ ಸಂಬಂಧಿತ ಸೋಂಕು ಯಾವಾಗಲೂ ಹೆಚ್ಚು ಅಪಾಯಕಾರಿ ಎಂದು ನಾನು ಹೇಳುತ್ತಿದ್ದೆ. ದುರದೃಷ್ಟವಶಾತ್ ಕರೋನ ಅಂತಹ ಒಂದು ಸೋಂಕು. ಕರೋನ ಸೋಂಕು ಕೆಲವು ವಿಷಯಗಳಲ್ಲಿ infuenza ತರಹವಿದ್ದರೂ, ಇತರ ವಿಷಯಗಳಲ್ಲಿ ತುಂಬಾ ವಿಭಿನ್ನವಾಗಿದೆ. ಎಬೋಲಾ ಒಂದು ಅತ್ಯಂತ ಭಯಾನಕ ಸೋಂಕಾಗಿದ್ದರೂ, ಅದು ತುಂಬಾ ಅಸ್ವಸ್ಥರಾಗಿರುವವರ (ಅಂದರೆ ರೋಗದ ಗುಣಲಕ್ಷಣ ಹೊಂದಿರುವವರ) ನಿಕಟ ಸಂಪರ್ಕ ಹೊಂದಿರುವವರಿಗೆ ಮಾತ್ರ ಹರಡುತ್ತದೆ. ಆದರೆ, ಕರೋನ ಸೋಂಕು ಅತ್ಯಂತ ಸುಲಭವಾಗಿ ಹರಡುತ್ತದೆ. ಸೋಂಕಿನ ಗುಣಲಕ್ಷಣವಿಲ್ಲದಿದ್ದವರೂ ಸಹ ಈ ಸೋಂಕನ್ನು ಇತರರಿಗೆ ಹರಡಬಲ್ಲರು. ಅಲ್ಲದೆ, ನಮಗೆಲ್ಲ ಯಾವಾಗಲೂ ಬಾಧಿಸುವ ಸಾಮಾನ್ಯ ಫ್ಲೂ ಜ್ವರದ ಮರಣ ಪ್ರಮಾಣ ಕೇವಲ ೦.೧% ಇದ್ದರೆ, ಕರೋನ ಸೋಂಕಿನ ಮರಣ ಪ್ರಮಾಣ ಇದಕ್ಕಿಂತ ಶೇಕಡ ೧೦ ರಷ್ಟು ಹೆಚ್ಚು, ಅಂದರೆ ಕನಿಷ್ಠ ೧% ಇದೆ. ಹಾಗಾಗಿ, ಕರೋನ ಬರಿ ಸುಲಭವಾಗಿ ಹರಡುವ ಸೋಂಕಲ್ಲದೆ, ಹೆಚ್ಚು ಬಾಧಿಸುವ ಅದರಲ್ಲೂ ಈಗಾಗಲೇ ಹೃದಯ ಮತ್ತು ಶ್ವಾಸಕೋಶ ಖಾಯಿಲೆಗಳು ಹಾಗೂ ಮಧುಮೇಹಗಳಂತಹ ಸಮಸ್ಯೆಗಳಿಂದ ನರಳುತ್ತಿರುವ ವಯೋವೃದ್ಧರಿಗೆ ಹೆಚ್ಚು ಜೀವಹಾನಿ ಉಂಟು ಮಾಡುವ ಸೋಂಕಾಗಿದೆ. ಹಾಗಾಗಿ, ಇದು ಇತರ ಸೋಂಕುಗಳಿಗಿಂತ ಭಿನ್ನ ಮತ್ತು ಅಪಾಯಕಾರಿ.
ಸಂದರ್ಶಕ: ಆನ್ಲೈನ್ ಜಾಲತಾಣಗಳಲ್ಲಿ ಹಲವಾರು ವಿಷಯಗಳು ಹರಿದಾಡುತ್ತಾ, ಗೊಂದಲಗಳನ್ನು ಸೃಷ್ಟಿಸುತ್ತಿವೆ. ಇಂತಹ ಕೆಲವು ವಿಷಯಗಳ ಬಗ್ಗೆ ಚರ್ಚಿಸೋಣ. ಮೊದಲಿಗೆ ಈ ಸೋಂಕು ಹೇಗೆಲ್ಲಾ ನಮಗೆ ಬರಬಹುದು? ಆನ್ಲೈನ್ ನಲ್ಲಿ ಕೊಂಡುಕೊಂಡ ವಸ್ತುಗಳ ಪ್ಯಾಕೆಟ್ ಗಳನ್ನು ಮುಟ್ಟಬಹುದಾ? ಹೊರಗಡೆ ಮಾರುಕಟ್ಟೆಗಳಿಗೆ ಹೋದಾಗ ವಸ್ತುಗಳನ್ನು ಮುಟ್ಟಬಹುದಾ? ಎಷ್ಟು ದೂರ ಕರೋನ ವೈರಸ್ ಸಂಚರಿಸಬಹುದು? ಎನ್ನುವುದೆಲ್ಲದರ ಬಗ್ಗೆ ಗೊಂದಲಗಳಿವೆ. ಈ ಬಗ್ಗೆ ಪ್ರತಿಯೊಬ್ಬರೂ ಯಾವ ರೀತಿ ಎಚ್ಚರಿಕೆ ವಹಿಸಬೇಕು?
ಡಾ|| ಫೌಚಿ: ಹಲವಾರು ಹಂತಗಳಲ್ಲಿ ಈ ಸೋಂಕು ಹರಡುವ ಅಪಾಯವಿದೆ. ಆದರೆ, ಸಾಮಾನ್ಯವಾಗಿ ಇದು ಹರಡುವ ಬಗೆಯನ್ನು ನಾವು ಮೊದಲು ಅರ್ಥ ಮಾಡಿಕೊಳ್ಳಬೇಕು. ಸೋಂಕು ಇರುವ ವ್ಯಕ್ತಿ ಕೆಮ್ಮಿದಾಗ ಅಥವಾ ಸೀನಿದಾಗ ಅದರಿಂದ ಹೊರಬರುವ ವೈರಸ್ ತುಂಬಿರುವ ಹನಿಗಳು ಇತರರಿಗೆ ಸುಲಭವಾಗಿ ಸೋಂಕನ್ನು ಹರಡುತ್ತವೆ. ಇವು ಸಾಮಾನ್ಯವಾಗಿ ಕೆಲವೇ ಕ್ಷಣಗಳಲ್ಲಿ ಕೆಳಗೆ ಬೀಳುತ್ತವೆ. ಇದರ ಜೊತೆಗೆ, ತಕ್ಷಣ ಕೆಳಗೆ ಬೀಳದೆ ಗಾಳಿಯಲ್ಲೇ ಸ್ವಲ್ಪ ಹೊತ್ತು ಇರುವ ಏರೋಸಾಲ್ ಗಳು ಸಹ ವೈರಸ್ ನ್ನು ಇನ್ನೊಬ್ಬರಿಗೆ ಹರಡುತ್ತವೆ. ಸೋಂಕಿತರು ಇದ್ದು ಹೋದ ನಂತರ ಕೊಠಡಿಗೆ ಬರುವ ನೀವು, ರೂಮಿನಲ್ಲಿ ಯಾರು ಇಲ್ಲ ಹಾಗಾಗಿ ನಾನು ಇಲ್ಲಿ ಸುರಕ್ಷಿತ ಎಂದುಕೊಂಡರೂ, ಅಲ್ಲಿರುವ ಏರೋಸಾಲ್ ಗಳನ್ನು ಉಸಿರಿನ ಮೂಲಕ ಸೇವಿಸಿದಾಗ ಸೋಂಕಿತರಾಗಬಹುದು. ಜೊತೆಗೆ, ಸೋಂಕು ಸುಲಭವಾಗಿ ಹರಡುವ ಇನ್ನೊಂದು ಮುಖ್ಯ ವಿಧಾನ ಹಸ್ತಲಾಘವ. ಯಾವುದೇ ವ್ಯಕ್ತಿ ಸಾಮಾನ್ಯವಾಗಿ ಕೆಮ್ಮುವಾಗ ಅರಿವಿಲ್ಲದೆ ತಮ್ಮ ಕೈಗಳನ್ನು ಮುಖಕ್ಕೆ ಹಿಡಿಯುತ್ತಾರೆ. ತದನಂತರ, ಇತರರಿಗೆ ಹಸ್ತಲಾಘವ ನೀಡಿದಾಗ ಅಥವಾ ಅವರು ಮುಟ್ಟಿದ ಜಾಗದಲ್ಲಿ ನಾವು ಮುಟ್ಟಿದಾಗ (ಉದಾಹರಣೆಗೆ ಸೋಂಕಿತರು ತೆಗೆದ ಬಾಗಿಲನ್ನು ನಾವು ಸಹ ಅದೇ ಜಾಗವನ್ನು ಹಿಡಿದು ತೆಗೆದಾಗ) ವೈರಸ್ ನಮ್ಮ ದೇಹ ಸೇರುತ್ತದೆ. ಯಾಕೆಂದರೆ, ವೈರಸ್ಗಳು ಸ್ಟೀಲ್ ಮತ್ತು ಪ್ಲಾಸ್ಟಿಕ್ ಗಳಂತಹ ನಿರ್ಜೀವ ವಸ್ತುಗಳ ಮೇಲೆ ಹಲವಾರು ಗಂಟೆಗಳ ಕಾಲ ಬದುಕಬಲ್ಲದು. ಹಾಗಂತ ನಾವು ಎಲ್ಲ ವಸ್ತುಗಳನ್ನ ಒರೆಸುತ್ತಾ ಕೂರುವ ಬ್ರಾಂತಿಗೆ ಒಳಗಾಗಬೇಕಾಗಿಲ್ಲ. ಆಗಾಗ್ಗೆ ಕೈ ತೊಳೆಯುವ ಮೂಲಕ ಅಲ್ಲಲ್ಲಿ ಮುಟ್ಟಿದ ನಂತರ ಅಂಟಿಕೊಳ್ಳುವ ವೈರಸ್ ನ್ನು ಸ್ವಚ್ಛಗೊಳಿಸಬಹುದು. ಹಾಗೆಯೇ, ಇತರರ ಕೈ ಕುಲುಕುವ ಅಭ್ಯಾಸವನ್ನು ಬಿಡಬೇಕು. ಆನ್ಲೈನ್ ನಲ್ಲಿ ಖರೀದಿಸಿದ ವಸ್ತುಗಳನ್ನು ತೊಳೆಯುವ ಅವಶ್ಯಕತೆಯಿಲ್ಲ, ಏಕೆಂದರೆ ಈ ತರಹದ ವಸ್ತುಗಳ ಮೇಲ್ಮೈಗಳಲ್ಲಿ ವೈರಸ್ ಬಹಳ ಕಾಲ ಬದುಕುವುದಿಲ್ಲ.
ಸಂದರ್ಶಕ: ನೀವು ಪ್ರಾರಂಭದಲ್ಲಿ ಈ ಸೋಂಕಿನ ಮರಣ ಪ್ರಮಾಣದ ಬಗ್ಗೆ ಹೇಳಿದಿರಿ. ಈ ಸೋಂಕಿನಿಂದ ದೀರ್ಘಕಾಲೀನ ಉಸಿರಾಟ ತೊಂದರೆಯಿಂದ ಬಳಲುತ್ತಿರುವ ವಯೋವೃದ್ಧರು ಹೆಚ್ಚು ಸಾವನ್ನಪ್ಪುತ್ತಿದ್ದಾರೆ ಎಂದು ತಿಳಿದಿದೆ. ಆದರೆ, ಇದರಿಂದ ಜನರು ಕರೋನ ಸೋಂಕು ಯುವಕರಿಗೆ ಬಾಧಿಸುವುದಿಲ್ಲ ಎಂದು ತಿಳಿದುಕೊಂಡಿದ್ದಾರೆ. ಇದರ ಬಗ್ಗೆ ವಿವರಿಸಿ.
ಡಾ|| ಫೌಚಿ: ಜನರು ಎರಡು ವಿಷಯವನ್ನು ಅರ್ಥಮಾಡಿಕೊಳ್ಳುತ್ತಿಲ್ಲ. ಒಂದು. ನೀವು ಯುವಕರಾದ ಮಾತ್ರಕ್ಕೆ ಕರೋನ ಸೋಂಕು ನಿಮಗೆ ಬರಲಾರದು ಎಂಬುದು ಸುಳ್ಳು. ಈಗಾಗಲೇ ಉಸಿರಾಟ ಸಮಸ್ಯೆ ಹಾಗು ವಿವಿಧ ದೀರ್ಘಕಾಲೀನ ರೋಗಗಳಿಂದ ನರಳುತ್ತಿರುವ ವಯೋವೃದ್ಧರು ಕರೋನದಿಂದ ಬಳಲುತ್ತಿರುವುದು ಸತ್ಯವಾದರೂ, ೩೦ ರಿಂದ ೪೦ ವರ್ಷಗಳ ಯುವಕರೂ ಸಹ ಸೋಂಕಿತರಾಗುತ್ತಿರುವುದಲ್ಲದೆ, ತೀವ್ರ ನಿಗಾ ಘಟಕಗಳಲ್ಲೂ ದಾಖಲಾಗುತ್ತಿದ್ದಾರೆ. ಇದರಲ್ಲಿ ಹೆಚ್ಚಿನ ಪ್ರಮಾಣ ವಯೋವೃದ್ಧರು ಅನ್ನುವುದು ಸತ್ಯವಾದರೂ ಯುವಕರು ಸಹ ಈ ಸೋಂಕನ್ನು ಹೊಂದಬಹುದು. ಎರಡನೇ ವಿಷಯ. ಗಂಭೀರವಾಗಿ ಈ ಸೋಂಕು ನಿಮಗೆ ಬಾಧಿಸದಿದ್ದರೂ, ಕೆಲವೇ ಸೌಮ್ಯ ಗುಣಲಕ್ಷಣಗಳು ಅಥವಾ ಯಾವುದೇ ಗುಣಲಕ್ಷಣಗಳಿಲ್ಲದ್ದರೂ ನೀವು ಇನ್ನೊಬ್ಬರಿಗೆ ಸೋಂಕನ್ನು ಹರಡಬಲ್ಲರಿ. ನಿಮ್ಮಿಂದ ಸೋಂಕಿತರಾದವರೂ ಮುಂದೆ ಯಾವುದಾದರೂ ದುರ್ಬಲ ವಯೋವೃದ್ಧರಿಗೆ ಸೋಂಕನ್ನು ಹರಡಿ ಅವರ ಸಾವಿಗೆ ಕಾರಣರಾಗಬಹುದು. ಉದಾಹರಣೆಗೆ ನಾನೊಬ್ಬ ಯುವಕ. ನಾನು ಆರೋಗ್ಯವಾಗಿದ್ದೇನೆ ಎಂದು ಮನೆಗೆ ತೆರಳಿ ನನ್ನ ಮನೆಯಲ್ಲಿರುವ ಅಜ್ಜ-ಅಜ್ಜಿ ಅಥವಾ ರೋಗಗ್ರಸ್ತ ಸಂಬಂಧಿಕರಿಗೆ ಸೋಂಕು ಹರಡಿಸುವುದು ಸರಿಯೇ? ನಮ್ಮನ್ನು ನಾವು ರಕ್ಷಿಸಿಕೊಳ್ಳುವ ಜೊತೆಯಲ್ಲಿ, ನಮ್ಮ ಸಂಸಾರವನ್ನು ಹಾಗೂ ಆ ಮೂಲಕ ಸಮಾಜವನ್ನು ರಕ್ಷಿಸುವ ಜವಾಬ್ದಾರಿ ಕೂಡಾ ನಮ್ಮದಾಗಿರುತ್ತದೆ.
ಸಂದರ್ಶಕ: ಸಾಮಾಜಿಕ ಜಾಲತಾಣಗಳಲ್ಲಿ ಕರೋನಾ ಸೋಂಕಿಗೆ ಬಳಸಬಹುದಾದ ಹಲವಾರು ಔಷಧಗಳ ಬಗ್ಗೆ ಚರ್ಚೆಯಾಗುತ್ತಿದೆ. ಮಲೇರಿಯಾ ಔಷಧಗಳಿರಬಹುದು ಅಥವಾ ಕ್ಲೋರೊಕ್ವಿನ್ ಇರಬಹುದು. ನೀವು ಸ್ವಯಂ ಔಷಧೋಪಚಾರ ಮಾಡಿಕೊಳ್ಳುವ ಜನಸಾಮಾನ್ಯರಿಗೆ ಯಾವ ರೀತಿ ಎಚ್ಚರಿಕೆ ನೀಡಲು ಬಯಸುತ್ತೀರಾ? ಅಥವಾ ಈಗಾಗಲೇ ಯಾವುದಾದರೂ ಔಷಧಗಳನ್ನು ಕರೋನಾ ಗೆ ಕಂಡುಹಿಡಿದಿದ್ದಾರಾ? ಈ ವಿಷಯದ ತಜ್ಞರಾಗಿ ಏನು ಹೇಳಬಯಸುತ್ತೀರಾ?
ಡಾ|| ಫೌಚಿ: ಇದುವರೆಗೆ ಕರೋನಾಗೆ ಯಾವುದೇ ಸುರಕ್ಷಿತ ಮತ್ತು ಪರಿಣಾಮಕಾರಿಯಾದ ನೇರ ಚಿಕಿತ್ಸೆಗಳನ್ನು ಕಂಡುಹಿಡಿದಿಯಲಾಗಿಲ್ಲ. ಆದರೆ, ಯಾವ ಔಷಧವನ್ನ ಬಳಸಬಹುದು; ಯಾವುದನ್ನು ಬಳಸಲು ಸಾಧ್ಯವಿಲ್ಲ; ಯಾವುದು ಸುರಕ್ಷಿತ ಎಂಬ ಕುರಿತು ಹಾಗೂ ಈಗಾಗಲೇ ಇತರ ಸೋಂಕುಗಳಿಗೆ ಅನುಮೋದಿತ ಔಷಧಗಳನ್ನು ಬಳಸಲು ಇರುವ ಸಾಧ್ಯತೆಗಳ ಬಗ್ಗೆ ಹಲವಾರು ವೈದ್ಯಕೀಯ ಪ್ರಯೋಗಗಳು ನಡೆಯುತ್ತಿರುವುದು ಹೌದಾದರೂ, ಇವುಗಳಲ್ಲಿ ಯಾವುದನ್ನೂ ಬಳಸಬೇಕು ಎಂಬುದು ಇನ್ನೂ ಸಾಭೀತಾಗಿಲ್ಲ. ಅತ್ಯಂತ ಕುತೂಹಲಕಾರಿಗಳಾದ ಜನರು ಪ್ರಯೋಗಗಳಿಂದ ಸಾಭೀತಾಗದ ಔಷಧಗಳನ್ನು ಬಳಸುವ ಬಗ್ಗೆ ಚರ್ಚಿಸುತ್ತಿದ್ದಾರೆ. ಆದರೆ, ಈಗಾಗಲೇ ಅನುಮೋದನೆಯಾಗಿರುವ ಔಷಧಗಳನ್ನು ಸುರಕ್ಷಿತವೆಂದು ಪರಿಗಣಿಸಿದ್ದರೂ, ಅವುಗಳಲ್ಲೂ ವಿಷಕಾರಿ ಅಂಶಗಳಿವೆ. ಹಾಗಾಗಿ, ಈ ತರಹದ ಔಷಧಗಳ ವೈದ್ಯಕೀಯ ಪ್ರಯೋಗಗಳನ್ನು ಶೀಘ್ರವಾಗಿ ಕೈಗೊಂಡು ಜನರಿಗೆ ತಲುಪಿಸುವ ಕಾರ್ಯವನ್ನು ನಡೆಸುತ್ತಿದ್ದೇವೆ. ಯಾರೂ ಸಹ ಸ್ವಯಂ ಔಷಧೋಪಚಾರ ಮಾಡಿಕೊಳ್ಳದೆ ವೈದ್ಯರ ಸಲಹೆ ಪಡೆಯುವುದು ಅತ್ಯವಶ್ಯಕ.
ಸಂದರ್ಶಕ: ಒಂದು ಸಮಯಾವಧಿ ಬಗ್ಗೆ ನಾವು ಕೇಳುತ್ತಿದ್ದೇವೆ. ಬೇರೆ ದೇಶದಿಂದ ಬಂದವರು ೧೪ ದಿನಗಳವರೆಗೆ ಕಾಯ್ಬೇಕು ಅಂತಾರೆ. ಈ ೧೪ ದಿನ ನಾವು ಯಾಕೆ ಬಂಧಿಯಾಗಿರಬೇಕು. ಯಾಕೆ ಈ ಸಮಯ? ಇಷ್ಟು ಸಮಯ ಜನ ಪರಸ್ಪರರಿಂದ ದೂರ ಇದ್ದರೇ ಕರೋನಾ ವೈರಸ್ ಹೋಗಿಬಿಡೊತ್ತೆಯೇ?
ಡಾ|| ಫೌಚಿ: ಈ ಸಮಯ ಅನ್ನೋದು ವೈರಸ್ ನಮ್ಮೊಳಗಿರುವ ಸಮಯ. ಸಾಮಾನ್ಯವಾಗಿ ವೈರಸ್ ನ ಸೈಕಲ್ ನ್ನ ವಾರಗಳಲ್ಲಿ ಅಳೆಯುತ್ತೇವೆ. ಹೆಚ್ಚಿನ ಜನ ಈ ಎರಡು ವಾರಗಳ ಸಮಯದಲ್ಲಿ ಎಲ್ಲಾ ಸರಿ ಹೋಗುತ್ತದೆ ಎಂದು ಕೊಂಡಿದ್ದಾರೆ. ಆದರೆ, ಅದು ಆ ಪ್ರದೇಶದಲ್ಲಿ ವೈರಸ್ ಹರಡಿರುವ ಹಂತದ ಮೇಲೆ ಅವಲಂಬಿತವಾಗಿದೆ. ನ್ಯೂಯಾರ್ಕ್ ನಗರದ ಉದಾಹರಣೆ ತೆಗೆದುಕೊಳ್ಳುವುದಾದರೆ, ಇಲ್ಲಿ ವೈರಸ್ ಹೆಚ್ಚು ತಾಂಡವವಾಡುತ್ತಿದೆ . ಹಾಗಾಗಿ, ಎರಡು ವಾರಗಳಲ್ಲಿ ಇಲ್ಲಿ ಸೋಂಕು ಕಡಿಮೆಯಾಗುತ್ತದೆ ಎನ್ನಲು ಸಾಧ್ಯವಿಲ್ಲ. ಇಲ್ಲಿ ಪ್ರಸ್ತುತ ಸೋಂಕಿನ ಪ್ರಮಾಣ ಏರುತ್ತಲೇ ಇದೆ. ಅದು ಕಡಿಮೆಯಾಗುವ ಹಂತ ಬಂದಾಗ ವೈರಸ್ ನ ಸೈಕಲ್ ನಮಗೆ ಅರಿವಾಗುತ್ತದೆ. ಚೀನಾ ಮತ್ತು ಕೊರಿಯಾ ದೇಶಗಳ ಅನುಭವವನ್ನ ನೋಡುವುದಾದರೆ ಅಲ್ಲಿ ವೈರಸ್ ನ ಆರ್ಭಟ ಕಡಿಮೆಯಾಗಲು ೮ ವಾರಗಳೇ ಬೇಕಾದವು. ಆದರೆ ಒಂದು ದೇಶದಿಂದ ಇನ್ನೊಂದು ದೇಶಕ್ಕೆ ಈ ಸಮಯ ಬದಲಾಗೋತ್ತೇ.
ಸಂದರ್ಶಕ: ಈ ಸೋಂಕಿನಿಂದ ಗುಣಮುಖರಾದವರಿಗೆ ಮತ್ತೆ ಸೋಂಕು ಕಾಣಿಸಿಕೊಳ್ಳುವ ಸಾಧ್ಯತೆಯಿದೆಯೇ? ಅಥವಾ ಒಮ್ಮೆ ಗುಣಮುಖರಾದವರು ಸೋಂಕಿಗೆ ಪ್ರತಿರೋಧಕ ಶಕ್ತಿ ಹೊಂದುತ್ತಾರೆಯೇ?
ಡಾ।। ಫೌಚಿ: ಈ ಕುರಿತು ಯಾವುದೇ ಸಂಶೋಧನೆ ಇನ್ನೂ ನಡೆದಿಲ್ಲವಾದುದರಿಂದ, ಈ ಪ್ರೆಶ್ನೆಗೆ ಶೇಕಡಾ ೧೦೦ ರಷ್ಟು ಸರಿಯಾಗಿ ಯಾರೂ ಉತ್ತರಿಸಲು ಸಾಧ್ಯವಿಲ್ಲ. ಆದರೆ, ಇತರ ವೈರಸ್ ಗಳಂತೆ ಕರೋನಾದಲ್ಲೂ ಸಹ ಒಮ್ಮೆ ಸೋಂಕಿತರಾಗಿ ಗುಣಮುಖರಾದವರು ರೋಗ ನಿರೋಧಕ ಶಕ್ತಿ ಹೊಂದುತ್ತಾರೆ ಹಾಗೂ ಮರು ಸೋಂಕಿತರಾಗುವುದಿಲ್ಲ ಎಂಬ ಬಗ್ಗೆ ನನಗೆ ಸಂಪೂರ್ಣ ವಿಶ್ವಾಸವಿದೆ.
ಕರೋನ ಸೋಂಕಿನ ಆರ್ಭಟ ಹೆಚ್ಚುತ್ತಿರುವ ಈ ಸಂದರ್ಭದಲ್ಲಿ ನಾವು ಗೊಂದಲಗಳಿಗೆ ಕಿವಿಗೊಡದೆ, ಎಚ್ಚರಿಕೆ ವಹಿಸುವುದು ಬಹಳ ಮುಖ್ಯ. 'ಮನೆಯಲ್ಲಿರಿ-ಸುರಕ್ಷಿತವಾಗಿರಿ' ಎಂಬುದನ್ನ ಪರಿಪಾಲಿಸಿ, ನಮ್ಮ ಜೊತೆಗೆ ಇಡೀ ಕುಟುಂಬ ಹಾಗೂ ದೇಶವನ್ನು ರಕ್ಷಿಸೋಣ. ಜವಾಬ್ದಾರಿಯುತ ಪ್ರಜೆಗಳಾಗೋಣ, ಸೋಂಕನ್ನು ಹೊಡೆದೋಡಿಸೋಣ.
- ರೋಹಿತ್ ಕುಮಾರ್ ಹೆಚ್.ಜಿ.
#Corona #ಕರೋನಾ #ಜವಾಬ್ದಾರಿ #CoViD19 #Life #India #Fight_Against_Corona
