ಸಂಕೋಲೆ..

ಮನಸೇ ಎಲ್ಲಿ ನಡೆದೇ

ಹೇಳದೆ ಕೇಳದೆ..?

ಕಳೆದೋದ ಮನಸ

ನಾನು ಕೇಳಿದೆ.. 

ನಾ ಹೊರಟೆ ನನ್ನ 

ಮನಸ ಅರಸುತಾ.. 

ನನ್ನೊಳಗಿಹ ನನ್ನವರ 

ಸನಿಹ ಬಯಸುತಾ.. 

ಎಂದಿತೆನ್ನ ಮನ. 

ನೀನಿದ್ದರೂ ನನ್ನೊಡನೆ

ನಾ ಒಂಟಿಯೇ..

ನಿನ್ನ ಪ್ರೀತಿಯ ಜೊತೆಗೆ 

ಇರಲೆನ್ನ ಬಯಕೆ..

ನುಡಿಯಿತು ಮನವು.. 

ನನಗೂ ಆಸೆಯಿದೆ 

ನನ್ನವರ ಜೊತೆಗಿರಲು

ಹೇಗಿರಲಿ ನಾನು

ನೀನೊಬ್ಬನೇ ಹೊರಟಿರಲು..

ನನ್ನೂ ಜೊತೆ ಕರೆದೊಯ್ಯು

ನಿನ್ನ ದಮ್ಮಯ್ಯ.. ಬೇಡಿದೆ ನಾನು.

ಪರಿಸ್ಥಿತಿಯ ಸಂಕೋಲೆಯಲ್ಲಿ 

ಬಂಧಿ ನೀನು, 

ನಿನ್ನ ಕಾದು ಕುಳಿತರೆ 

ಹೇಗೋ ಏನೋ..

ನಾನಂತೂ ಹೊರಡುವೆ ಇನ್ನು.. 

ಹೇಳಿ ತೊರೆಯಿತು ಮನಸು.. 

ನನ್ನವರ ನೆನೆದು

ಮನಸನ್ನ ಕರೆದು

ಕಾಲವ ಜರಿದು

ಕಂಬನಿಗೊರಗಿದೆ ಮೌನಕೆ ಸರಿದು.. 

- ರೋಹಿತ್