ಜರ್ಮನಿಯ ಮನೋವೈದ್ಯ ಮತ್ತು ನರರೋಗ ತಜ್ಞರಾದ ಡಾ| ಅಲಾಯಿಸ್ ಅಲ್ ಝೈಮರ್ ರವರು ೧೯೦೬ ರ ಸಮ್ಮೇಳನವೊಂದರಲ್ಲಿ ಉಪನ್ಯಾಸ ನೀಡುತ್ತಾ, ತಮ್ಮಲ್ಲಿ ಚಿಕಿತ್ಸೆಗೆ ಬಂದ ರೋಗಿಯಾದ ೫೧ ವರ್ಷದ 'ಆಗಸ್ಟೆ' ಎಂಬ ಮಹಿಳೆಯಲ್ಲಿ ತಾವು ಗಮನಿಸಿದ ಗುಣಲಕ್ಷಣಗಳನ್ನು ಪ್ರಥಮ ಬಾರಿಗೆ ಜಗತ್ತಿಗೆ ವಿವರಿಸಿದರು. ಮುಂದೆ, ಈ ಖಾಯಿಲೆಗೆ ಅಲ್ ಝೈಮರ್ ನ ಖಾಯಿಲೆ ಅಥವಾ ಚಿಕ್ಕದಾಗಿ ಅಲ್ ಝೈಮರ್ಸ್ ಎಂದೇ ಹೆಸರಿಸಲಾಯಿತು. ಅಲ್ ಝೈಮರ್ಸ್ ಶೇಕಡಾ ೬೦-೭೦ ರಷ್ಟು ಬುದ್ದಿಮಾಂದ್ಯತೆಗೆ ಕಾರಣವಾಗುತ್ತಿರುವ ಒಂದು ನರಶೂಲ ರೋಗವಾಗಿದೆ. ಸಾಮಾನ್ಯವಾಗಿ ೬೫ ವರ್ಷದ ನಂತರದ ಪ್ರಾಯದವರಲ್ಲೇ ಕಾಣಿಸಿಕೊಳ್ಳುವ ಈ ಖಾಯಿಲೆಯ ಬೆಳವಣಿಗೆ ದಶಕಗಳಷ್ಟು ಹಿಂದಿನಿಂದಲೇ ಪ್ರಾರಂಭಗೊಳ್ಳುತ್ತದೆಂದು 'ಪಾಟ್ರಿಸಿಯಾ ಲೊಟ್ಟೊ' ಎಂಬ ಮಹಿಳೆಯ ಡೈರಿಯಲ್ಲಿನ ವಿಚಾರಗಳಿಂದ ದೃಢಪಟ್ಟಿದೆ.
ತನ್ನಲ್ಲಿ ಬೆಳವಣಿಗೆಯಾಗುತ್ತಿರುವ ಮಾನಸಿಕ ಅಸ್ವಸ್ಥತೆಯ ಕುರಿತು ಚಿಂತಿತರಾದ ೬೫ ವರ್ಷದ ಪಾಟ್ರಿಸಿಯಾರವರು ತನಗಾಗುತ್ತಿರುವ ಅನುಭವಗಳನ್ನು ಬೇರೆಯವರೊಂದಿಗೆ ಹಂಚಿಕೊಳ್ಳಲಾಗದೆ, ಒಂದು ಡೈರಿಯಲ್ಲಿ ಬರೆಯಲಾರಂಭಿಸಿದರು. ೧೯೯೦ ರ ಮೇ ೧೨ ರಂದು ಆರಂಭಿಸಲಾದ ಆ ಡೈರಿಯ ಪ್ರಥಮ ಸಾಲಿನಲ್ಲೇ 'ನನಗೆ ಅಲ್ ಝೈಮರ್ ನ ಖಾಯಿಲೆಯಿದೆಯೆಂದು ಭಯವಾಗುತ್ತಿದೆ' ಎಂದು ಬರೆದುಕೊಳ್ಳುತ್ತಾರೆ. ಅಲ್ಲಿಂದ ಮುಂದೆ ತಮ್ಮ ಸ್ಥಿತಿಯನ್ನು ಅವಲೋಕಿಸುತ್ತಾ, 'ನಾನು ಯಾವುದನ್ನೂ ನೆನಪಿಸಿಕೊಳ್ಳಲಾಗದಿರುವ ನಿರ್ಜನ ಪ್ರದೇಶದೊಳಗೆ ಬಿದ್ದಿದ್ದೇನೆ. ಇದನ್ನು ಸ್ಪಷ್ಟವಾಗಿ ಬರೆಯಲು ಸಹ ನನಗೆ ಸಾಧ್ಯವಾಗದಿರುವುದು ಹೆಚ್ಚಿನ ಆಘಾತವನ್ನುಂಟುಮಾಡಿದೆ' ಎಂದು ಬರೆಯುತ್ತಾರೆ. ನಂತರದ ದಿನಗಳಲ್ಲಿ 'ತನ್ನ ಸಹಿಯನ್ನೂ ಮಾಡಲು ಕಷ್ಟವಾಗುತ್ತಿಹುದೇಕೆ ಎಂದು ಅರ್ಥವಾಗುತ್ತಿಲ್ಲ' ಎಂದು ಬರೆಯುತ್ತಾ 'ನನ್ನ ಮನಸ್ಸು ರಂಧ್ರಗಳಿಂದ ತುಂಬಿ ಹೋಗಿದೆ' ಎಂದು ತಮ್ಮ ಸ್ಥಿತಿಯನ್ನು ವಿವರಿಸುತ್ತಾರೆ. ೨೦ ವರ್ಷಗಳ ತರುವಾಯ ಪಾಟ್ರಿಸಿಯಾಗೆ ಅಲ್ ಝೈಮರ್ಸ್ ಇರುವುದು ದೃಢಪಡುತ್ತದೆ. ಆದರೆ, ಅಷ್ಟರಲ್ಲಾಗಲೇ ಏನನ್ನೂ ಸರಿಪಡಿಸಲಾಗದಷ್ಟು ತಡವಾಗಿ, ಪರಿಸ್ಥಿತಿ ಕೈಮೀರಿರುತ್ತದೆ.
ದೀರ್ಘಕಾಲ ಕಾಡುವ ಅಲ್ ಝೈಮರ್ಸ್ ನ ಬೆಳವಣಿಗೆ ಸಹ ವಿವಿಧ ಹಂತಗಳಲ್ಲಿ ಆಗುತ್ತದೆ. ಪ್ರಾಥಮಿಕ ಹಂತಗಳಲ್ಲಿ ಭಾಷೆಯ ವಾಗ್ದಾರೆ ಮತ್ತು ಸ್ಪಷ್ಟತೆ, ಯೋಚನಾ ಶಕ್ತಿ, ಕಾರ್ಯಕ್ಷಮತೆ ಹಾಗೂ ಚಲನೆಯ ಹೊಂದಾಣಿಕೆಗಳಲ್ಲಿ ಸಣ್ಣಪುಟ್ಟ ತೊಂದರೆಗಳು ಕಾಣಿಸಿಕೊಳ್ಳುತ್ತದೆ. ಮುಂದುವರೆದಂತೆ, ಓದಲು ಮತ್ತು ಬರೆಯಲು ಕಷ್ಟವಾಗುವುದು, ಮಾತಿನ ಮಧ್ಯದಲ್ಲಿ ಆಗಾಗ್ಗೆ ತಪ್ಪು ಪರ್ಯಾಯ ಪದಗಳು ಸೇರುವುದು ಹಾಗೂ ಸಂಕೀರ್ಣ ದೈನಂದಿನ ಚಟುವಟಿಕೆಗಳನ್ನು ಸ್ವತಂತ್ರವಾಗಿ ಕೈಗೊಳ್ಳಲು ಸಾಧ್ಯವಾಗದಂತಹ ಪರಿಸ್ಥಿತಿ ಬಂದೊದಗುತ್ತದೆ. ಹೆಚ್ಚಿನ ಸಮಯಗಳಲ್ಲಿ ಈ ಗುಣಲಕ್ಷಣಗಳನ್ನು ಮುಪ್ಪಿನಿಂದ ಬಂದವುಗಳೆಂದು ತಪ್ಪಾಗಿ ಅರ್ಥೈಸಿಕೊಳ್ಳಲಾಗುತ್ತದೆ. ಆದರೆ, ವಯೋಸಹಜ ಹಾಗೂ ಅಲ್ ಝೈಮರ್ಸ್ ಸಂಬಂಧಿತ ಮರೆವಿನಲ್ಲಿ ಭಿನ್ನತೆಯಿರುತ್ತದೆ. ಉದಾಹರಣೆಗೆ, ವಯೋಸಹಜ ಮರೆವಿನಲ್ಲಿ ಕಾರಿನ ಕೀಯನ್ನು ಇಟ್ಟಿರುವ ಜಾಗವನ್ನು ಮರೆತರೆ, ಅಲ್ ಝೈಮರ್ಸ್ ನ ಸಂದರ್ಭದಲ್ಲಿ ಅದೇ ಕೀಯನ್ನು ಸಾಮಾನ್ಯವಾಗಿ ಇಡುವ ಜಾಗಕ್ಕಿಂತಲೂ ವಿಚಿತ್ರವಾದ ಜಾಗಗಳಲ್ಲಿ (ಉದಾ: ರೆಫ್ರಿಜರೇಟರ್) ಇಡುತ್ತಾರೆ. ಹಾಗೆಯೇ, ಓಡಾಡುವಾಗ, ಒಂದು ಅಥವಾ ಎರಡು ತಿರುವುಗಳಲ್ಲಿ ದಾರಿ ಮರೆಯುವುದು ಸಹಜವಾಗಿದ್ದು, ದಿನನಿತ್ಯ ಓಡಾಡುವ ಜಾಗಗಳಲ್ಲೇ ಕಳೆದು ಹೋದ ಭಾವನೆ ಬಂದು, ಆ ಜಾಗಕ್ಕೆ ಹೇಗೆ ಬಂದೆನೆಂದೇ ಅರಿವಾಗದಿರುವುದು ಅಲ್ ಝೈಮರ್ಸ್ ನ ಗುಣಲಕ್ಷಣವಾಗಿದೆ. ಖಾಯಿಲೆಯ ಕೊನೆಯ ಹಂತದಲ್ಲಿ ದೀರ್ಘವಧಿ ನೆನಪುಗಳು ಸಂಪೂರ್ಣ ನಶಿಸಿ ಹೋಗುವುದರ ಜೊತೆಗೆ ಮೌಖಿಕ ಭಾಷಾ ಸಾಮರ್ಥ್ಯ ನಷ್ಟ, ಭ್ರಮನಿರಸನಗೊಳ್ಳುವುದು, ಯೋಚನಾ ಶಕ್ತಿ ಹರಣ, ಅನಿರೀಕ್ಷಿತ ಆಕ್ರಮಣಶೀಲತೆ ಹಾಗೂ ಯಾವ ಕೆಲಸವನ್ನೂ ಮಾಡಲಾಗದ ಸ್ಥಿತಿಗೆ ತಲುಪಿ ಹಾಸಿಗೆ ಹಿಡಿಯುತ್ತಾರೆ. ಕಡೆಯಲ್ಲಿ ನ್ಯುಮೋನಿಯಾಗಳಂತಹ ಅಂತರ್ಕಾಲೀನ ಸೋಂಕುಗಳಿಂದ ಮರಣ ಹೊಂದುತ್ತಾರೆ. ರೋಗನಿರ್ಣಯಗೊಂಡ ನಂತರ ರೋಗಿಯು ಕೇವಲ ೩ ರಿಂದ ೯ ವರ್ಷಗಳ ಕಾಲ ಮಾತ್ರ ಜೀವಿಸಬಲ್ಲರು. ಜಗತ್ತಿನಲ್ಲಿ ಪ್ರಸ್ತುತ ಸುಮಾರು ೪ ಕೋಟಿ ೭೫ ಲಕ್ಷ ಜನರು ಅಲ್ ಝೈಮರ್ಸ್ ನಿಂದ ಬಳಲುತ್ತಿದ್ದರೆ, ಭಾರತದಲ್ಲಿ ಈ ಸಂಖ್ಯೆ ಸುಮಾರು ೩೭ ಲಕ್ಷದಷ್ಟಿದೆ. ೨೦೩೦ ರ ವೇಳೆಗೆ ನಮ್ಮ ದೇಶದಲ್ಲಿನ ಅಲ್ ಝೈಮರ್ಸ್ ಬಾಧಿತರ ಸಂಖ್ಯೆ ದ್ವಿಗುಣಗೊಂಡು ಸುಮಾರು ೭೫ ಲಕ್ಷ ತಲುಪಬಹುದೆಂದು ಪರಿಣಿತರು ವರದಿ ನೀಡಿದ್ದಾರೆ.
ಅಲ್ ಝೈಮರ್ಸ್ ಗೆ ಕಾರಣಗಳಾವುವು ಎಂಬುದು ಇನ್ನೂ ಕೂಡಾ ಸ್ಪಷ್ಟವಾಗಿಲ್ಲ. ಆದರೆ, ಈ ಕುರಿತು ಕೆಲವು ಸಿದ್ಧಾಂತಗಳಿವೆ. ಈ ಸಿದ್ದಾಂತಗಳ ಪ್ರಕಾರ ಮೆದುಳಿನಲ್ಲಿ ನರಕೋಶಗಳ ಹೊರಗೆ ಮತ್ತು ಒಳಗೆ ಕ್ರಮವಾಗಿ ಶೇಖರಗೊಂಡು ನರಕೋಶಗಳ ಸಾವಿಗೆ ಕಾರಣವಾಗುವ ಅಮೈಲಾಡ್ ಬೀಟಾ ಮತ್ತು ಟಾವ್ ಎಂಬ ಎರಡು ಅಸಹಜ ಪ್ರೋಟೀನುಗಳು ಹಾಗೂ ಎರಡು ನರಕೋಶಗಳ ನಡುವೆ ಸಂಕೇತಗಳನ್ನು ಪ್ರಸರಿಸುವ ಅಸಿಟೈಲ್ ಕೊಲಿನ್ ನ ಪ್ರಮಾಣದಲ್ಲಾಗುವ ಕಡಿತಗಳು ಅಲ್ ಝೈಮರ್ಸ್ ಗೆ ಕಾರಣೀಭೂತ ಅಂಶಗಳಾಗಿವೆ. ಅಲ್ಲದೇ, ಹಲವು ಅನುವಂಶಿಕ ಧಾತುಗಳಲ್ಲಾಗುವ ಅಸಹಜ ರೂಪಾಂತರಗಳೂ ಅಲ್ ಝೈಮರ್ಸ್ ಗೆ ದಾರಿಯಾಗಬಹುದೆಂಬ ವಿಷಯವನ್ನು ಅಧ್ಯಯನಗಳು ಹೊರಹಾಕಿವೆ. ಇವುಗಳ ಜೊತೆಯಲ್ಲಿ, ಧೂಮಪಾನ ಹಾಗೂ ವಾಯುಮಾಲಿನ್ಯಗಳೂ ಸಹ ಈ ಖಾಯಿಲೆಯನ್ನು ತರಬಲ್ಲ ಅಪಾಯಕಾರಿ ಅಂಶಗಳಾಗಿವೆ.
ನಿರಾಶೆಯ ಸಂಗತಿಯೆಂದರೆ ಈ ಮೇಲಿನ ಎಲ್ಲಾ ಕಾರಣೀಯ ಅಂಶಗಳ ವಿರುದ್ಧ ಅಭಿವೃದ್ಧಿಪಡಿಸಲಾದ ಯಾವುದೇ ಔಷಧಗಳಿಂದ ಅಲ್ ಝೈಮರ್ಸ್ ನ್ನು ತಡೆಯಲು, ನಿಯಂತ್ರಿಸಲು ಅಥವಾ ಗುಣಪಡಿಸಲು ಸಾಧ್ಯವಾಗದಿರುವುದು. ಸಧ್ಯ ಬಳಕೆಯಲ್ಲಿರುವ ೪-೫ ಔಷಧಗಳೂ ಸೀಮಿತ ಪ್ರಯೋಜನವನ್ನು ತೋರುತ್ತಿರುವುದರಿಂದ ಪರಿಣಾಮಕಾರಿ ಚಿಕಿತ್ಸಾ ಕ್ರಮಗಳನ್ನು ಅಭಿವೃದ್ಧಿಪಡಿಸುವ ಅವಶ್ಯಕತೆಯಿದೆ.
ಹಲವಾರು ಅಧ್ಯಯನಗಳು ಸೃಜನಾತ್ಮಕ ಕ್ರಿಯೆಗಳಾದ ಓದು, ಬರವಣಿಗೆ, ಸಂಗೀತ ವಾದ್ಯ ನುಡಿಸುವಿಕೆ ಮತ್ತು ಪದಬಂಧ ಬಿಡಿಸುವಂತಹ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿರುವರಲ್ಲಿ ಅಲ್ ಝೈಮರ್ಸ್ ನ ಸಾಧ್ಯತೆ ಕಡಿಮೆ ಎಂದು ಅಭಿಪ್ರಾಯಪಟ್ಟಿವೆ. ಈ ರೀತಿ ಮೆದುಳಿನ ಕಾರ್ಯಚಟುವಟಿಕೆಯನ್ನು ಹೆಚ್ಚಿಸಿ, ಆ ಮೂಲಕ ಈ ಖಾಯಿಲೆಯನ್ನು ನಿಯಂತ್ರಿಸುವ ಗುರಿಯೊಂದಿಗೆ ಕೇಂಬ್ರಿಡ್ಜ್ ವಿಶ್ವವಿದ್ಯಾಲಯದ ಸಂಶೋಧಕರು 'ಗೇಮ್ ಶೋ' ಎಂಬ ನವೀನ ವೀಡಿಯೊ ಗೇಮ್ ಒಂದನ್ನು ಅಭಿವೃದ್ದಿಪಡಿಸಿ, ಅಧ್ಯಯನ ಕೈಗೊಂಡಿದ್ದಾರೆ. ಒಟ್ಟು ೪೨ ಪ್ರಾಥಮಿಕ ಹಂತದ ಅಲ್ ಝೈಮರ್ಸ್ ರೋಗಿಗಳು ಭಾಗವಹಿಸಿದ ಈ ಅಧ್ಯಯನದಲ್ಲಿ, ೨೧ ರೋಗಿಗಳು ಮಾತ್ರ ಪ್ರತಿ ವಾರ ೨ ಗಂಟೆಗಳಷ್ಟು ಕಾಲ ವಿವಿಧ ಹಂತಗಳಲ್ಲಿ ಹೆಚ್ಚು ಮಾನಸಿಕ ಸವಾಲೆಸೆಯುವ ಈ ಆಟವನ್ನು ಆಡಿದರು. ಆಡದಿದ್ದ ಉಳಿದ ೨೧ ರೋಗಿಗಳಿಗೆ ಹೋಲಿಸಿದಾಗ, ಆಡಿದ ರೋಗಿಗಳಲ್ಲಿ ಸ್ಮರಣಶಕ್ತಿ ವೃದ್ಧಿಯಾಗಿ ದಿನನಿತ್ಯದ ಚಟುವಟಿಕೆಗಳಿಗೆ ಸಹಕಾರಿಯಾಗಿದೆ. ಈ ಪರಿಣಾಮಕಾರಿ ಫಲಿತಾಂಶಗಳಿಂದ ಹರ್ಷಿತರಾದ ಸಂಶೋಧನೆಯ ರೂವಾರಿಗಳಲ್ಲೊಬರಾದ ಪ್ರೊ| ಬಾರ್ಬರ ಸಾಹಕಿಯನ್ ರವರು 'ಮೆದುಳಿನ ತರಬೇತಿ ಅಲ್ ಝೈಮರ್ಸ್ ರೋಗಿಗಳಿಗೆ ಪ್ರಯೋಜನಕಾರಿಯಾಗಬಲ್ಲದು' ಎಂದು ಹೇಳುತ್ತಾರೆ.
ಈ ಗೇಮ್ ಆಪ್ ನಿಂದ ನೇರವಾಗಿ ಖಾಯಿಲೆಯನ್ನು ಗುಣಪಡಿಸಲು ಸಾಧ್ಯವಾಗದಿದ್ದರೂ, ಸ್ಮರಣ ಸಂಬಂಧಿತ ಖಾಯಿಲೆಯ ಗುಣಲಕ್ಷಣಗಳನ್ನು ತಹಬದಿಗೆ ತರುವಲ್ಲಿ ಈ ಆಟವು ಸಹಕಾರಿಯಾಗಲಿದೆ. ಆದರೂ, ಇನ್ನೂ ಹೆಚ್ಚಿನ ಸಂಶೋಧನೆಯ ಅಗತ್ಯವಿದ್ದು, ತಂತ್ರಜ್ಞಾನಗಳ ಸದುಪಯೋಗದ ಜೊತೆಯಲ್ಲಿ ರೋಗನಿವಾರಕಗಳ ಅಭಿವೃದ್ಧಿಯೂ ಕೂಡಾ ಆಗಬೇಕಿದೆ. ಇವುಗಳೆಲ್ಲದಕ್ಕಿಂತ ಮಿಗಿಲಾಗಿ ರೋಗಿಗಳಿಗೆ ಪೂರಕವಾಗಿರುವಂತಹ ವಾತಾವರಣವನ್ನು ಮನೆಯಲ್ಲಿ ನಿರ್ಮಿಸಿ, ಅವರುಗಳಿಗೆ ಸೂಕ್ತ ಆರೈಕೆ ನೀಡುವುದು ಅತ್ಯಂತ ಪ್ರಮುಖವಾಗಿದೆ. ನಮ್ಮ ಆಹಾರ ಪದ್ದತಿಯ ಬದಲಾವಣೆಯಿಂದ ಈ ಖಾಯಿಲೆಯನ್ನು ಅಲ್ಪಮಟ್ಟಿಗೆ ತಡೆಗಟ್ಟಬಹುದಾಗಿರುವುದರಿಂದ, ನಮಗೆ ಮರವು ಆವರಿಸುವ ಮುನ್ನ ನಮ್ಮ ಜೀವನಶೈಲಿಯನ್ನು ಸುಧಾರಿಸಿಕೊಳ್ಳುವ ಅವಕಾಶವೊಂದು ನಮ್ಮ ಮುಂದಿದೆ.
ಡಾ|| ರೋಹಿತ್ ಕುಮಾರ್ ಹೆಚ್. ಜಿ. । ವಿಕ್ರಮ । ೧೨-೧೧-೨೦೧೭
