ಅಂದು ನವೆಂಬರ್ ೦೯, ೨೦೧೬. ಗುಜರಾತಿನ ಅಹಮದಾಬಾದ್ ನಗರದ ಬಿ.ಜೆ.ಎಂ.ಸಿ. ಆಸ್ಪತ್ರೆಯಲ್ಲಿ ೩೪ ವರ್ಷದ ಮಹಿಳೆಯೊಬ್ಬರು ಒಂದು ಆರೋಗ್ಯವಂತ ಮಗುವಿಗೆ ಜನ್ಮ ನೀಡಿದರು. ಹೆರಿಗೆಯ ನಂತರ ಇನ್ನೂ ಆಸ್ಪತ್ರೆಯಲ್ಲಿರುವಾಗಲೇ ಸಣ್ಣ ಪ್ರಮಾಣದ ಜ್ವರ ಬಂದಿದ್ದರಿಂದ, ವೈದ್ಯರು ಡೆಂಗ್ಯೂ ಜ್ವರವಿರಬಹುದೆಂದು ಶಂಕಿಸಿ, ರಕ್ತದ ಮಾದರಿಯನ್ನು ಆಸ್ಪತ್ರೆಯಲ್ಲಿರುವ ವೈರಲ್ ರಿಸರ್ಚ್ ಅಂಡ್ ಡಯಾಗ್ನಾಸ್ಟಿಕ್ ಲ್ಯಾಬೋರೇಟರಿ (ವಿ. ಆರ್. ಡಿ. ಎಲ್.) ಗೆ ಕಳುಹಿಸಿದರು. ಗರ್ಭಧರಿಸಿದ ನಂತರ ಯಾವುದೇ ರೀತಿಯ ಜ್ವರದಿಂದ ಬಳಲದೇ ಇದ್ದ ಆ ತಾಯಿಯ ರಕ್ತದ ಪರೀಕ್ಷೆ ನಡೆಸಲಾಗಿ, ಪತ್ತೆಯಾಗುತ್ತದೆ ವೈರಾಣು 'ಝಿಕಾ'. ಅಲ್ಲಿಗೆ, ಸುಮಾರು ೭೦ ದೇಶಗಳನ್ನು ದಾಟಿ ಝಿಕಾ ವೈರಾಣು ಭಾರತಕ್ಕೆ ಬಂದು ತಲುಪಿದಂತಾಗಿದೆ.
೧೯೪೭ರ ಏಪ್ರಿಲ್ ನಲ್ಲಿ ಉಗಾಂಡಾದ ಝಿಕಾ ಅರಣ್ಯದಲ್ಲಿನ ರೀಸಸ್ ಮಕಾಕ್ ಮಂಗದಿಂದ ಪ್ರಪ್ರಥಮವಾಗಿ ಬೇರ್ಪಡಿಸಲಾದ ಈ ವೈರಾಣು ' ಫ್ಲ್ಯಾವಿವಿರಿಡೇ' ಎಂಬ ವೈರಸ್ ನ ಗುಂಪಿಗೆ ಸೇರಿದ್ದು, ಮೂಲ ಅರಣ್ಯದ ಹೆಸರನ್ನೇ ವೈರಾಣುವಿಗೂ ಇಡಲಾಗಿದೆ. ಡೆಂಗ್ಯೂ, ಹಳದಿ ಜ್ವರ ಮತ್ತು ಜಪಾನೀಸ್ ಏನ್ಸೆಫಲೈಟಿಸ್ ರೋಗಾಣುಗಳ ಗುಂಪಿಗೆ ಸೇರಿರುವ ಝಿಕಾ ವೈರಾಣುವು ಮಾನವನಿಗೂ ಸಹ ಸೋಂಕನ್ನು ತರಬಲ್ಲವು ಎಂದು ೧೯೫೨ ರಲ್ಲಿ ಉಗಾಂಡ ಮತ್ತು ತಾಂಜೇನಿಯಾದಲ್ಲಿ ನಡೆದ ರಕ್ತ ಪರೀಕ್ಷೆಗಳ ಸಮೀಕ್ಷೆಯಿಂದ ದೃಢಪಟ್ಟಿದೆ. ಈ ಸಮೀಕ್ಷೆಯಲ್ಲಿ ಪರೀಕ್ಷಿಸಲಾದ ಒಟ್ಟು ೯೯ ರಕ್ತದ ಮಾದರಿಗಳಲ್ಲಿ ೬ ಮಾದರಿಗಳು ಝಿಕಾ ಸೋಂಕನ್ನು ಹೊಂದಿದ್ದವು. ಮಂಗನಿಂದ ಮಾನವನಿಗೆ ವೈರಾಣುವನ್ನು ಹಗಲಿನಲ್ಲಿ ಕ್ರಿಯಾಶೀಲವಾಗಿರುವ 'ಈಡೀಸ್' ಜಾತಿಯ ಸೊಳ್ಳೆಗಳು ಪ್ರಾಥಮಿಕ ಸಂಪರ್ಕ ಮಾಧ್ಯಮವಾಗಿ ಪಸರಿಸಬಲ್ಲವು ಎಂದು ೧೯೪೮ರಲ್ಲೇ ಝಿಕಾ ಅರಣ್ಯದ ಸೊಳ್ಳೆಗಳಿಂದ ರೋಗಾಣುಗಳನ್ನು ಬೇರ್ಪಡಿಸುವ ಮೂಲಕ ಕಂಡುಹಿಡಿಯಲಾಯಿತು. ಅಲ್ಲದೇ, ರಕ್ತದ ವರ್ಗಾವಣೆಯಿಂದ, ಲೈಂಗಿಕ ಸಂಪರ್ಕದಿಂದ ಹಾಗೂ ಗರ್ಭಧಾರಣೆಯ ಸಂದರ್ಭದಲ್ಲಿ ತಾಯಿಯಿಂದ ಮಗುವಿಗೂ ಸಹ ಝಿಕಾ ವೈರಾಣು ಹರಡಬಲ್ಲದಾಗಿದೆ. ಝಿಕಾ ಸೋಂಕಿತ ಪ್ರದೇಶಗಳಿಂದ ಇತರ ಪ್ರದೇಶಗಳಿಗೆ ಪ್ರವಾಸ ಕೈಗೊಳ್ಳುವವರು ಈ ವೈರಾಣು ಹರಡಲು ಕಾರಣೀಭೂತರಾಗುತ್ತಾರೆ.
ಝಿಕಾ ಸೋಂಕಿತರು ಸಣ್ಣ ಪ್ರಮಾಣದ ಜ್ವರ (೩೮. ಡಿಗ್ರಿಗಿಂತ ಕಡಿಮೆ ಉಷ್ಣತೆಯ), ಚರ್ಮಗಳ ಮೇಲೆ ಚಿಕ್ಕ ಚಿಕ್ಕ ಕೆಂಪು ಬಾವುಗಳು, ಮಾಂಸಖಂಡ ನೋವು, ಕೀಲುಗಳಲ್ಲಿ ಊತದೊಂದಿಗಿನ ನೋವು, ತಲೆ ನೋವು, ಕಣ್ಣುಗಳ ಹಿಂದಿನ ಭಾಗದಲ್ಲಿ ನೋವು ಹಾಗು ಕಂಜೆಕ್ಟಿವೈಟಿಸ್ ನಿಂದ ಬಳಲುತ್ತಾರೆ. ಈ ಗುಣಲಕ್ಷಣಗಳು ಸೌಮ್ಯವಾಗಿರುವ ಪರಿಣಾಮ ಹೆಚ್ಚಿನ ಸಂದರ್ಭಗಳಲ್ಲಿ ಗಮನಕ್ಕೆ ಬಾರದೇ ಹೋಗುತ್ತವೆ ಅಥವಾ ಡೆಂಗ್ಯೂ ಜ್ವರವೆಂದು ತಪ್ಪಾಗಿ ಅರ್ಥೈಸಿಕೊಳ್ಳಲಾಗುತ್ತದೆ. ಝಿಕಾ ಸೋಂಕನ್ನು ವೈರಾಣುವಿನ ನ್ಯೂಕ್ಲಿಯಿಕ್ ಆಸಿಡ್ (ಆರ್. ಎನ್. ಎ.) ಪತ್ತೆ ಹಾಗೂ ರಕ್ತ ಪರೀಕ್ಷೆಗಳ ಮೂಲಕ ಗುರುತಿಸಬಹುದಾಗಿದೆ. ಆದರೆ, ಈ ಸೋಂಕಿಗೆ ಯಾವುದೇ ರೀತಿಯ ವೈರಾಣು ನಿರೋಧಕ ಔಷಧ ಅಥವಾ ಲಸಿಕೆಗಳು ಇನ್ನೂ ಅಭಿವೃದ್ಧಿಯಾಗಿಲ್ಲದಿರುವುದರಿಂದ, ಪ್ರಸ್ತುತ ಕೇವಲ ಗುಣಲಕ್ಷಣಗಳನ್ನು ಉಪಶಮನಗೊಳಿಸುವಂತಹ ಔಷಧಗಳನ್ನು ( ಉದಾ: ಜ್ವರ ಮತ್ತು ನೋವು ನಿವಾರಕಗಳು) ಮಾತ್ರ ಸೂಚಿಸಲಾಗುತ್ತಿದೆ. ಸೋಂಕಿತರಲ್ಲಿ ಬಹುಪಾಲು ಜನರು ಯಾವುದೇ ಹೆಚ್ಚಿನ ತೊಂದರೆಗಳಿಗೆ ಒಳಗಾಗದೆ ಗುಣಮುಖರಾಗುತ್ತಾರೆ. ಈ ಸೋಂಕಿನಿಂದ ಆಸ್ಪತ್ರೆಗಳಿಗೆ ದಾಖಲಾಗುವ ಸಂಖ್ಯೆಯೂ ಸಹ ವಿರಳವಾಗಿದ್ದು, ಇಲ್ಲಿಯವರೆಗೆ ಯಾವುದೇ ಪ್ರಾಣಹಾನಿಯು ದಾಖಲಾಗಿಲ್ಲ. ಹಾಗಾದರೇ, ಏಕೆ ನಾವು ಈ ಬಗ್ಗೆ ಗಮನ ಹರಿಸಬೇಕು? ನಮ್ಮ ದೇಶಕ್ಕೆ ವೈರಾಣು ಬಂದಿರುವುದರ ಕುರಿತು ಏತಕ್ಕೆ ಚಿಂತೆಗೊಳಗಾಗಬೇಕು ಎಂದು ಪ್ರೆಶ್ನಿಸುವುದಾದರೆ, ಉತ್ತರ ಮುಂದೆ ಇದೆ.
ಗರ್ಭಧಾರಣೆ ಸಂದರ್ಭದಲ್ಲಿ ಝಿಕಾ ವೈರಾಣುವಿನಿಂದ ಸೋಂಕಿತರಾದಲ್ಲಿ ಮುಂದೆ ಜನಿಸುವ ಮಗುವು ಮೈಕ್ರೋಸೆಫಾಲಿ ಅಥವಾ ಇತರೆ ಮೆದುಳಿನ ವಿರೂಪತೆಯನ್ನು ಹೊಂದುವ ಸಾಧ್ಯತೆಯಿರುತ್ತದೆ. ಮೆದುಳಿನ ಬೆಳವಣಿಗೆಯಲ್ಲಿನ ನ್ಯೂನ್ಯತೆಗಳಿಂದ ಮಗುವಿನ ತಲೆ ಸಹಜ ಗಾತ್ರಕ್ಕಿಂತ ಚಿಕ್ಕದಾಗಿರುವುದನ್ನು ಮೈಕ್ರೋಸೆಫಾಲಿ ಎಂದು ಕರೆಯುತ್ತಾರೆ. ಯಾವುದೇ ಔಷಧಗಳಿಲ್ಲದ ಮೈಕ್ರೋಸೆಫಾಲಿಯನ್ನು ಹೊಂದಿರುವ ಮಗು, ಭೌದ್ದಿಕ ನ್ಯೂನ್ಯತೆ, ಕುಬ್ಜತೆ, ಅಸಹಜ ಮುಖಲಕ್ಷಣ, ಚಲನೆಯಲ್ಲಿ ತೊಂದರೆ, ಮಾತನಾಡುವಲ್ಲಿ ದುರ್ಬಲತೆ ಹಾಗೂ ರೋಗಗ್ರಸ್ತವಾಗುವಿಕೆಗಳಂತಹ ತೀವ್ರವಾದ ಸಮಸ್ಯೆಗಳಿಂದ ಬಳಲುತ್ತದೆ. ಅಲ್ಲದೇ, ಈ ರೋಗಕ್ಕೆ ತುತ್ತಾದ ಮಗುವಿನ ಜೀವಿತಾವಧಿ ಸಹ ಕುಂಠಿತಗೊಳ್ಳುತ್ತದೆ. ವಯಸ್ಕರಲ್ಲಿ ಝಿಕಾ ಸೋಂಕು ನರವ್ಯೂಹದಲ್ಲಿನ ನರಕೋಶಗಳು ಹಾನಿಗೊಳಗಾಗುವಂತಹ ಗುಲೈನ್-ಬಾರ್ ಸಿಂಡ್ರೋಮ್ ಎನ್ನುವ ಅಪರೂಪದ ಅಸ್ವಸ್ಥತೆಯನ್ನು ತಂದೊಡ್ಡುತ್ತದೆ. ಇದರಿಂದ ಕೈ-ಕಾಲುಗಳ ಮರಗಟ್ಟುವಿಕೆ ಮತ್ತು ನಿಶ್ಯಕ್ತಿ, ಆಹಾರ ನುಂಗಲು ತೊಂದರೆ, ಬೆನ್ನು ಮತ್ತು ಕುತ್ತಿಗೆಯಲ್ಲಿ ನೋವು, ಮೇಲ್ಭಾಗದ ಶ್ವಾಸೇಂದ್ರಿಯ ಸೋಂಕು, ರಕ್ತದೊತ್ತಡ ಮತ್ತು ಹೃದಯ ಬಡಿತದಲ್ಲಿ ಏರುಪೇರು, ಹಾಗೂ ಅತಿಸಾರಗಳಂತಹ ಸಮಸ್ಯೆಗಳು ಎದುರಾಗುತ್ತವೆ. ತೀವ್ರವಾದ ಸಂದರ್ಭಗಳಲ್ಲಿ ಉಸಿರಾಟ ವಿಫಲತೆಗೂ ಕಾರಣವಾಗಿ , ಆ ಮೂಲಕ ಪ್ರಾಣಹಾನಿಗೂ ದಾರಿಯಾಗುತ್ತದೆ, ಈ ಎಲ್ಲಾ ಕಾರಣಗಳಿಂದಾಗಿಯೇ ನಾವು ಝಿಕಾ ಕುರಿತು ಎಚ್ಚರಿಕೆಯೊಂದಿಗಿನ ಅರಿವನ್ನು ಹೊಂದುವ ಅವಶ್ಯಕತೆಯಿದೆ.
ಹಾಗಾದರೆ, ಭಾರತಕ್ಕೆ ಬರುವ ಮೊದಲು ಝಿಕಾ ಯಾವ ಯಾವ ದೇಶಗಳಲ್ಲಿ ತನ್ನ ಉಪಸ್ಥಿತಿಯನ್ನು ತೋರಿದೆ? ೧೯೫೨ ರಿಂದ ಸುಮಾರು ೫ ದಶಕಗಳಿಗೂ ಹೆಚ್ಚಿನ ಕಾಲ ಈಡೀಸ್ ಸೊಳ್ಳೆಗಳಲ್ಲಿ ಜೀವಿಸಿದ ಈ ವೈರಾಣುವು, ೨೦೦೭ ರಲ್ಲಿ ಪ್ರಥಮ ಬಾರಿಗೆ ಫೆಡೆರೇಟೆಡ್ ಸ್ಟೇಟ್ಸ್ ಆಫ್ ಮಿಕ್ರೋನಿಷಿಯಾದ ಯಾಪ್ ದ್ವೀಪದಲ್ಲಿ ಸಾಂಕ್ರಾಮಿಕ ರೋಗಕ್ಕೆ ಕಾರಣವಾಗಿ, ಒಟ್ಟು ೪೯ ಜನರಿಗೆ ಅಸ್ವಸ್ಥತೆಯನ್ನು ಉಂಟುಮಾಡಿತು. ಅಲ್ಲಿಂದ ೨೦೧೩ರ ಅಕ್ಟೋಬರ್ ನಲ್ಲಿ ಫ್ರೆಂಚ್ ಪಾಲಿನೀಷಿಯಾದಲ್ಲಿ ಗುಲೈನ್-ಬಾರ್ ಸಿಂಡ್ರೋಮ್ ನೊಂದಿಗೆ ಕಾಣಿಸಿಕೊಂಡ ಝಿಕಾ, ಜನವರಿ ೨೦೧೪ ರಲ್ಲಿ ಫ್ರಾನ್ಸ್ ನ ನ್ಯೂ ಕಾಲೆಡೋನಿಯಾ, ಚಿಲಿ ದೇಶದ ಈಸ್ಟರ್ ದ್ವೀಪ ಮತ್ತು ನ್ಯೂಜಿಲ್ಯಾಂಡ್ ನ ಕೂಕ್ ದ್ವೀಪಗಳಿಗೂ ಲಗ್ಗೆಯಿಟ್ಟು ಸುಮಾರು ೧೩೮೫ ಜನರಿಗೆ ಸೋಂಕನ್ನು ಹರಡಿತು. ಮುಂದೆ, ೨೦೧೫ರಲ್ಲಿ ಬ್ರೆಜಿಲ್ ನಿಂದ ಆರಂಭಗೊಂಡ ಝಿಕಾ ಆರ್ಭಟ, ಮೆಕ್ಸಿಕೋ, ಕೆರೆಬಿಯನ್ ಪ್ರದೇಶಗಳೊಂದಿಗೆ ಅಮೆರಿಕಾವನ್ನು ಸಹ ಆವರಿಸಿತು. ೨೦೧೫ರ ಮೇ ಮತ್ತು ನವಂಬರ್ ತಿಂಗಳ ನಡುವೆ ಕೇವಲ ೭ ತಿಂಗಳ ಅವಧಿಯಲ್ಲಿ ೧೩ ಲಕ್ಷ ಜನರು ಝಿಕಾದಿಂದ ಸೋಂಕಿತರಾಗಿದ್ದು, ಸುಮಾರು ೪೦೦೦ ಝಿಕಾ ಸಂಬಂಧಿತ ಮೈಕ್ರೋಸೆಫಾಲಿ ಪ್ರಕರಣಗಳು ಬೆಳಕಿಗೆ ಬಂದಿವೆ. ೨೦೧೬ರ ನಂತರದಲ್ಲಿ ಝಿಕಾವು ಬಾಂಗ್ಲಾದೇಶ, ಸಿಂಗಾಪುರ್, ತಾಂಜೇನಿಯಾ ಹಾಗೂ ಆಂಗೋಲದಲ್ಲೂ ಸಹ ಹರಡುತ್ತಿರುವ ಖಚಿತ ಪ್ರಕರಣಗಳಿವೆ.
ಈತನ್ಮಧ್ಯೆ, ೨೦೧೭ರ ಮೇ ೧೫ ರಂದು ಭಾರತ ಸರ್ಕಾರದ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ ದೇಶದಲ್ಲಿ ಮೂರು ಝಿಕಾ ಪ್ರಕರಣಗಳು ಖಚಿತವಾಗಿವೆಯೆಂದು ವರದಿ ನೀಡಿದೆ. ಇದರಲ್ಲಿ ಎರಡು ಪ್ರಕರಣಗಳಲ್ಲಿ ಗರ್ಭಿಣಿಯರು ಸೋಂಕಿತರಾಗಿರುವುದು ಆತಂಕಕಾರಿ ವಿಷಯವಾಗಿದೆ. ಈ ನಿಟ್ಟಿನಲ್ಲಿ ತುರ್ತಾಗಿ ಕ್ರಮಕೈಗೊಳ್ಳುವ ಅವಶ್ಯಕತೆಯಿದ್ದು, ಈಗಾಗಲೇ ಭಾರತದ ಹಲವಾರು ವೈದ್ಯಕೀಯ ಸಂಶೋಧನಾ ಸಂಸ್ಥೆಗಳು, ರಕ್ತದ ಮಾದರಿ ಮತ್ತು ಸೊಳ್ಳೆಗಳಲ್ಲಿ ಝಿಕಾ ವೈರಾಣುವನ್ನು ಪತ್ತೆ ಮಾಡುವ ಕಾರ್ಯದಲ್ಲಿ ತೊಡಗಿವೆ. ಅಂತಾರಾಷ್ಟ್ರೀಯ ಮಟ್ಟದ ಕಂಪನಿಗಳು ಝಿಕಾಗೆ ಲಸಿಕೆಯನ್ನು ಅಭಿವೃದ್ಧಿಪಡಿಸುವಲ್ಲಿ ನಿರತವಾಗಿದ್ದು, ಜೂನ್ ೨೦೧೬ರಂದು ಎಫ್.ಡಿ.ಎ. ಪ್ರಥಮ ಝಿಕಾ ಲಸಿಕೆಯನ್ನು ಮಾನವನಲ್ಲಿ ಪರೀಕ್ಷಿಸಲು ಅನುಮೋದನೆ ನೀಡಿದೆ. ಇವುಗಳ ಯಶಸ್ಸಿನ ಕುರಿತು ಇನ್ನೂ ಹೆಚ್ಚಿನ ಸಂಶೋಧನೆಗಳ ನಂತರವಷ್ಟೇ ನಮಗೆ ವಿವರ ಲಭ್ಯವಾಗಲಿದೆ.
ಸೊಳ್ಳೆಗಳಿಂದ ಹರಡುವ ಎಲ್ಲ ಇತರ ಸೋಂಕುಗಳಂತೆ ಝಿಕಾವನ್ನು ಸಹ ಸೊಳ್ಳೆಗಳ ಬೆಳವಣಿಗೆಯನ್ನು ನಿಯಂತ್ರಿಸುವ ಮೂಲಕ ತಡೆಗಟ್ಟಬಹುದಾಗಿದೆ. ವಾಸಸ್ಥಳದ ಸುತ್ತಮುತ್ತ ನೀರು ನಿಲ್ಲದಂತೆ ಎಚ್ಚರ ವಹಿಸುವುದು ಇದಕ್ಕಿರುವ ಮಾರ್ಗವಾಗಿದೆ. ಅಲ್ಲದೇ, ಸೊಳ್ಳೆನಾಶಕ, ಸೊಳ್ಳೆ ಪರದೆಗಳನ್ನು ಬಳಸಿ, ಉದ್ದವಾದ ಬಟ್ಟೆಗಳನ್ನು ಧರಿಸುವುದರಿಂದಲೂ ಸಹ ಸೊಳ್ಳೆಗಳಿಂದ ಸೋಂಕು ಪಸರಿಸದಂತೆ ಮಾಡಬಹುದಾಗಿದೆ. ಆದರೆ, ಬದಲಾಗುತ್ತಿರುವ ಕಾಲದಲ್ಲಿ ವಾತಾವರಣದಲ್ಲಿ ಹೆಚ್ಚುತ್ತಿರುವ ಮಾಲಿನ್ಯ ಹಾಗೂ ತಾಪಮಾನ ಏರಿಕೆಗಳು ಸಹ ಖಾಯಿಲೆಗಳನ್ನು ತರುವ ಜೀವಾಣುಗಳ ಶೀಘ್ರ ಹರಡುವಿಕೆಗೆ ಕಾರಣವಾಗಿದೆ. ಝಿಕಾ ೨೧ನೇ ಶತಮಾನದ ಅತಿ ದೊಡ್ಡ ಮಾರಕವಾಗುವ ಎಲ್ಲಾ ಸಾಧ್ಯತೆಗಳಿರುವುದರಿಂದ, ಇದರತ್ತ ನಾವು ಎಚ್ಚರವಹಿಸುವುದು ಅತ್ಯಗತ್ಯವಾಗಿದೆ.
ಡಾ। ರೋಹಿತ್ ಕುಮಾರ್ ಎಚ್. ಜಿ.
ಬ್ಲಾಗ್ ಸೈಟ್: www.rohitkumarhg.blogspot.com
ಫೇಸ್ ಬುಕ್ ಪುಟ: www.facebook.com/rohitkumarhg1
ಈ ಅಂಕಣ ಕನ್ನಡ ಪ್ರಭ ಪತ್ರಿಕೆಯಲ್ಲಿ ದಿನಾಂಕ ೨೭-೦೬-೨೦೧೭ ರಂದು ಪುಟ ಸಂಖ್ಯೆ ೮ (ಇತರೆ ಸಂಚಿಕೆಗಳು) ಮತ್ತು ೧೨ (ಬೆಂಗಳೂರು ಸಂಚಿಕೆ)ರಲ್ಲಿ ಪ್ರಕಟಗೊಂಡಿದೆ. ಇ-ಪೇಪರ್ ಗಾಗಿ ಕೆಳಗಿನ ಲಿಂಕನ್ನು ಬಳಸಿರಿ.
